مشاهده دیوان استاد مولوی کرد (ئه‌مجارسه‌ختته‌ره‌ن)

متن کامل شعر ئه‌مجارسه‌ختته‌ره‌ن:

ئه‌مجارسه‌ختته‌ره‌ن زام جه جاران

چل مدو دایم چون گه‌سته‌ی ماران

هه‌ر وه زور مه‌نده‌ن رای ئامای نه‌فه‌س

تای ریشه‌ی تاقه‌ت شییه‌نم جه ده‌س

بلیسه‌ی فیراق سوچنان جه‌سته‌م

ناسوره‌ن زامان گازی خه‌م به‌سته‌م

دووی که‌واوی دل پوشان سه‌ر هه‌ردان

زه‌رد که‌رده‌ن روخسار پاییزی ده‌ردان

سه‌رسامه‌ن عاله‌م یه‌کسه‌ر جه ناله‌م

فه‌له‌ک موره‌ی به‌د شانا وه تاله‌م

مه‌ینه‌ت سه‌ر به‌رزه‌ن شادیم زگاره‌ن

ساقی جامه‌که‌ت ئه‌مجار وه‌کاره‌ن

بوری وه مه‌جلیس لا به‌ر په‌رده‌ی شه‌رم

وه ده‌وری دیسان به‌زمی که‌رمی گه‌رم

تا موتریب وه ساز حه‌نجه‌ره‌ی بی‌گه‌رد

هوردو مه‌قامی ده‌وا که‌رو ده‌رد

به‌ل ناکا نه‌یچی به‌یو جه لاوه

وه مه‌قامه‌که‌ی قه‌قنه‌س ئاساوه

به‌زمیمان جه‌م بو چون هه‌رده جاران

بنوشین جامی وه یادی یاران

هه‌ر وه زور مه‌نده‌ن نیم نه‌فه‌س باقی

پر که‌ر جامه‌کت ده‌خیلم ساقی

ئه‌ر ئازیز وه‌ی ته‌ور لیم که‎رو سته‌م

خه‌لاسیم نییه‌ن ئه‌مجار خاتر جه‌م

عه‌ره‌ق چون شه‌ونم نیشته‌ن نه رووی گول

ته‌ر که‌رده‌ن تاتای توغراکه‌ی سونبول

جه قازانی خه‌م دل که‌رده‌ن وه ئاو

وه درو ماچو مه‌گیروو گولاو

ئازیزم گولاو بوی خووی کولمی تون

ئه‌ر بوی تو نه‌بو گولاو جه کون

زه‌ره‌ی بوی زولفت که‌فته‌ن نه به‌رزان

بوی گولان که‌رده‌ن جه به‌رزان هه‌رزان

ئازیز وه مه‌رگت گه‌ر ئینسافت بو

هه‌نی کافییه‌ن بوی زولفت په‌ی تو

ئیتر چ حاجه‌ت ویت مه‌ده‌ی عه‌زاو

قه‌بوول که‌ری جه‌ور مه‌گیری گولاو