مشاهده دیوان استاد مولوی کرد (ئیحیا نه‌بوون)

متن کامل شعر ئیحیا نه‌بوون:

ئیحیا نه‌بوون سا نه‌شوون مه‌رده‌ن

نامه‌که‌ش ئامان گله‌ییش که‌رده‌ن

قاسد شو وه لای ئه‌و نه‌ونه‌مامه

چون یاوای پیش‌ده‌ر ئه‌ی جواو نامه

جه‌و ئه‌سکه‌نجه‌بین ده‌س سوروشته‌که‌ت

یانی نامه‌که‌ی زیبا و زوشته‌که‌ت

به باده‌که‌ی ویت جام جام وه‌رده‌وه

تالی سه‌فرای ده‌رد دووریش به‌رده‌وه

فه‌رمابیت به‌و له‌فز شه‌که‌ر رازه‌وه

گا جه رووی عیتاب گا وه نازه‌وه

نه وه‌ختی هیجران ویداعت فاما

نه وه شه‌مالدا په‌یامت ئاما

ده‌یسا هوریزه خه‌میاره‌که‌ی ویم

بو شاد به‌ر وه دین دیداره‌که‌ی ویم

تو تیره‌که‌ی ویت وه زامداریی ویم

تو بی‌باکیی ویت بورده‌باریی ویم

ئه‌و وه‌خت پای کاو هه‌ردی دل ته‌م بو

ئه‌ساسه‌ی دووریی ئازیزان جه‌م بو

چون نه‌بریو تای رشته‌ی سه‌بووری

گوش چون ویش مدو وه قسه‌ی دووری

زوان چون تاقه‌ت هیممه‌ت وازیشه‌ن

دیده چون تاقه‌ت شون دیاییشه‌ن

گیج مدو ده‌روون چه‌نی نیش ئامان

به‌لام هه‌ی سه‌رخیل نه‌و توول نه‌مامان

چون یارای نه‌فه‌س به‌راوه‌رده‌مه‌ن

سوزش وه شه‌مال ره‌وان‌که‌رده‌مه‌ن

مه‌ته‌رسوو جه حیفز ته‌قریری ئه‌حوال

سوچو خه‌زانه‌ی خه‌یالی شه‌مال

من خو شه‌و و رو ئاره‌زووی تومه‌ن

په‌ری دیده‌نت نه‌زر و فتومه‌ن

به‌لام یه‌ن وه یاد بالا‌که‌ی تووه

ده‌ورم دان وه ده‌ور سارا و سه‌رکووه

بوی بالات هه‌رزان وه ده‌شت و ده‌ر دان

نمه‌ز رای لای توم وه‌کام گوزه‌ردان

گله‌ی تو وه‌ی ته‌ور حاله‌ت وه‌ی نه‌سه‌ق

دووریچت وه‌ی ره‌نگ خودا تو وه حه‌ق