مشاهده دیوان استاد مولوی کرد (ئه‌نیسی خه‌یال)

متن کامل شعر ئه‌نیسی خه‌یال:

ئه‌نیسی خه‌یال ده‌ردانی پر زام

مه‌رهه‌می جه‌سته‌ی خه‌سته‌که‌ی ناکام

خه‌یلین نه گیجاو به‌حری مه‌هجووری

نه ده‌وری دووه‌ی ته‌نووره‌ی دووری

پووشه‌که‌ی جه‌سته‌م وه په‌نا که‌فته‌ن

سامیعه‌م خه‌به‌ر یاران نه‌شنه‌فته‌ن

ئینشه‌للا چه‌نی خوشحالی شادی

نه شاخه‌ی شوخیی گه‌ردوون ئازادی

چه‌نی وه‌شبه‌ختی دوو ده‌س نه گه‌رده‌ن

عومرتان وه عه‌یش عوشره‌ت ویه‌رده‌ن

نه‌ک چون من جه ده‌س بی‌مه‌یلی دلبه‌ر

مه‌کیشوو هه‌ر سات هه‌زار ده‌ردیسه‌ر

دایم دل ره‌نجوور هیجرانی یارم

زه‌نجیری جه‌فای زولفی نیگارم

خوسووس شه‌راره‌ی دووری زور که‌رده‌ن

مه‌زره‌عه‌ی هه‌ستیم وای سه‌بوون به‌رده‌ن

که‌س به وینه‌ی من پر مه‌ینه‌ت نه‌بو

گووفتاری دوس بی‌به‌ینه‌ت نه‌بو

هیچ‌که‌س موبته‌لای دووریی یار نه‌بو

چون من سه‌رگه‌ردان بی‌قه‌رار نه‌بو

که‌س نه‌بو چون من یاری به‌دکاران

زامداری موژه‌ی دیده خوماران

جه هاژه‌ی هووناو ده‌روونی پر ده‌رد

نه گه‌ردشی چه‌رخ گه‌ردوونی چه‌پ‌گه‌رد

تا جه تو بریام وه مه‌رگت قه‌سه‌م

ساتی ئاسایش نه‌دیه‌نم وه چه‌م

نه‌که‌ری خه‌یال گله‌یی که‌رده‌ن

نه‌واچی باده‌ی بی‌شه‌رتیش وه‌رده‌ن

ئه‌ر زه‌لیلی ده‌س بی‌شه‌رتان نه‌بوون

که‌ی مه‌بو مه‌یلت فه‌راموش که‌روون