مشاهده دیوان استاد مولوی کرد (ئیمشه‌و دیاره‌ن)

متن کامل شعر ئیمشه‌و دیاره‌ن از مولوی کرد:

ئیمشه‌و دیاره‌ن بانگم بی‌شه‌رمه‌ن

زایه‌له‌ی سه‌متوور که‌لله‌م وه گه‌رمه‌ن

سه‌دای زیل و به‌م مه‌ینه‌ت سه‌د ته‌رزه‌ن

خه‌فه‌ت شادیشه‌ن خه‌م ده‌ماخ به‌رزه‌ن

هوشم بی‌هوشه‌ن فامم قامه‌ت قاخ

بوی دووریی ئازیز مه‌یوم نه ده‌ماخ

نه‌یچی دره‌نگه‌ن سا مه‌که‌ر دره‌نگ

فیدای په‌نجه‌ت بام نه‌ی باوه‌ر وه ده‌نگ

هه‌ر ته‌رزی په‌ی ویش بکه‌رو رزای

گیرو نه ده‌روون هه‌ر سازی گازی

بجوشو هه‌ر که‌س وه قه‌د ناله‌ی ویش

بنوشو هه‌ر که‌س وه پیاله‌ی ویش

جه‌لای هه‌ر گه‌ردی وه سه‌داییوه‌ن

ده‌وای هه‌ر ده‌ردی وه نه‌واییوه‌ن

هه‌ر مه‌قامیوه‌ت جگه‌ر تاون بو

تفلی بیچاره‌ی دلان لاون بو

ئه‌و سه‌دای ده‌رده خه‌یلی دلکه‌ش بو

دل تفلان ئاسا به‌لکم دلوه‌ش بو

هه‌ی په‌شیویی هوش هه‌ی شیویای فام

هه‌ی عه‌قلی عه‌به‌س هه‌ی خه‌یالی خام

من و دلوه‌شی و سه‌فایی که‌رده‌ن

هوونی یه‌کته‌رین تا وه روی مه‌رده‌ن

سا ده‌ی ساحیب نه‌ی ریشه‌ی دل که‌ر په‌ی

تالیم‌ده‌ر ئه‌ی فه‌رد وه نه‌زمه‌که‌ی نه‌ی

ئیمشه‌و وه هه‌ر حال شه‌و وه رو به‌روون

ئه‌ی خوا سا مه‌رگی سه‌حه‌ر چیش که‌روون