مشاهده دیوان استاد مولوی کرد (ئازیزم ئاهیر)

متن کامل شعر ئازیزم ئاهیر از مولوی کرد:

ئازیزم ئاهیر دووریی بالای تو

جه‌سته‌م که‌رد وه بوول شه‌مال به‌رد په‌ی کو

ورشه‌ی پرشه‌ی تاو کووره‌که‌ی جه‌سته‌م

شه‌راره‌ی لووله‌ی پیشه‌ی شکه‌سته‌م

گرمه و پزیسکه‌ی چه‌خماخه‌ی پاره

به‌رقی بریسکه‌ی شوعله‌ی شه‌راره

شاخه‌ی شریخه‌ی برووسکه‌ی ده‌روون

نه چه‌م شه‌تاوان جاری که‌رد چوون هوون

مه‌وج مدو لافاو هوونی ده‌جله‌ی دل

نه فواره‌ی چه‌م هورمشانو گل

کای دلم نه گیج مه‌وجی فه‌نادا

موله‌قه‌ن نه به‌ین خوف و رجادا

تویچ ئینسافت بو هه‌نی وه‌سه‌ن وه‌س

بیللا جه دووریت ها بیم وه قه‌قنه‌س

تاکه‌ی چوون مه‌جنوون ویلی هه‌ردان بم

تاکه‌ی خه‌م‌زه‌ده‌ی باری هیجران بم

هه‌ر ساتی دووریت سه‌د ساله‌ن جه لام

ده‌ردم کارییه‌ن وه سه‌رگه‌ردت بام

به‌زه‌ییت به‌یو وه جه‌سته و حالم

ریشه‌م به‌راما هه‌ره‌س وه مالم