(دیم و دیم) دانلود دکلمه ناله‌ی جودایی از هیمن موکریانی همراه با متن

دانلود دکلمه 

متن دکلمه ناله‌ی جودایی از هیمن موکریانی:

کورده‌واری ئه‌ی وڵاته جوانه‌که‌م

ڕۆڵه‌که‌م خێزانه‌که‌م باوانه‌که‌م

ئه‌ی ئه‌وانه‌ی قه‌ت له‌بیرم ناچنه‌وه

ئێسته بمبینن ئه‌رێ ده‌مناسنه‌وه

ڕۆژگار هاڕیومی وه‌ک ئه‌سپۆنی ورد

هێز و توانای لێ بڕیوم ده‌رده کورد

بوومه گه‌پجاڕ و ده‌کا گاڵته‌ی به‌من

ئه‌و ڕه‌مووزنه‌ی زه‌نده‌قی چووبوو له من

ئه‌ی ڕه‌فیقان ئه‌ی عه‌زیزانی وڵات

ئه‌ی برای هاوسه‌نگه‌ری جه‌رگه‌ی خه‌بات

گه‌ر ده‌ناڵینم ئه‌من په‌ککه‌وته نیم

تێ ده‌کۆشم بۆ وه‌سڵ تاکوو ده‌ژیم

کۆششی من زۆر به‌جێیه و زۆر ره‌وا

چونکه قانوونی ته‎‌بیعه‌ت وایه وا

هر کسی کو دور ماند از اصل خویش

باز جوید روزگار وصل خویش

ڕێگه ده‌بڕم کوانێ هه‌نگاوم شله

ڕاسته بێ هێزم ده‌که‌م ئه‌مما مله

هه‌ر دهپێوم کێو و شاخ و چۆڵ و ده‌شت

دێم به‌ره‌و کوێستان به‌ره‌و باخی به‌هه‌شت

دێم به‌ره‌و زیخ و چه‌و و کانیاوی خۆم

چۆن له‌وانه وه‌رده‌گێڕم چاوی خۆم

دێم به‌ره‌و ئه‌و دار و به‌رد و به‌نده‌نه

دێم به‌ره‌و ئه‌و باخ و مێرگ و چیمه‌نه

دێم به‌ره‌و زوورک و ته‌لان و که‌ند و له‌ند

دێم به‌ره‌و بژوێن و زه‌نوێر و زه‌مه‌ند

دێم به‌ره‌و پاناوک و هه‌وراز و نشێو

دێم به‌ره‌و ئه‌شکه‌وت و زه‌ندۆڵ و په‌سێو

دێم به‌ره‌و به‌فر و چلووره و به‌سته‌ڵه‌ک

دێم به‌ره‌و شیخاڵ و ڕێچکه و ڕه‌شبه‌ڵه‌ک

دێم به‌ره‌و لێڕ و چڕ و به‌ستێن و چۆم

دێم به‌ره‌و هه‌ڵدێر و گێژ و به‌ند و گۆم

دێم به‌ره‌و هۆبه و هه‌واری باسه‌فا

دێم به‌ره‌و لادێ به‌ره‌و کانگه‌ی وه‌فا

دێم ببینم نیشتمان و زێده‌که‌م

دێم ببینم خزم و کاک و دێده‌که‌م

دێم و ده‌گرم بازی بێری شۆخ و شه‌نگ

دێم و ده‌گرم ده‌ستی دۆی جوان و چه‌له‌نگ

دێم گراویی خۆم له باوه‌ش وه‌رگرم

دێم نه‌هێڵم به‌ر هه‌ڵست و به‌رگرم

دێم و هه‌ڵده‌مژم شنه‌ی کوێستانی کورد

دێم و ده‌چمه شه‌وڕنی بێستانی کورد

دێم و ده‌شکێنم له‌وێ جامی شه‌راب

ماچی شیرین نایه‌ڵێ تامی شه‌راب

دێم و ناترسم له په‌رژینی به زی

هه‌ر په‌ری سه‌رکه‌وت و دێوه‌زمه به‌زی

تا بمێنێ نووری چاو و هێزی پێم

دێم و دێم و دێم و دێم و دێم و دێم

دێم هه‌تا هه‌مبێ بڕست و بیر و هۆش

گه‌ر گلاشم کورده‌واری و ئێوه خۆش