دانلود آهنگ/دکلمه مانشت از سعید عبادتیان + متن

دانلود آهنگ 

متن دکلمه:

مانشت! دەسْ كی بنیادد بەنی؟
كام وا، كام واران، بنا ڕاد ژەنی؟ 
مانشت! زاڵْ زەڕ! وامەنەی ساڵان! 
پیرْ پرچ چەرمێ باوگْ ئەڤداڵان 
تا تو گەورا بۊد، وساید وه پاوه؛ 
بنچینەی بەشەر، هزار تووك داوه... 
خەمْ خوەراواوی خان‌مەسۊر دێری 
تووژاڵەی له زامْ دنیای دۊر دێری 
زەڕەی شاپەروەر ها واراندەو 
ها وه تەمەلۊلْ وەهاراندەو 
ها چۊزەی نەوڕەسْ قەی داراندەو 
ها وه سووسەن‌گوڵْ نساراندەو 
ئاسووْم، هەسەڵْ كەنۊ دارْده 
غەزەڵم، كەڵمەسْ قەی مەغارده 
چەویڕد چۊ چەترْ دۊیەتەگانمه 
داواند، داوانْ داڵگانمه 
بەڕۊێد باوگه، وەند دایەمه، 
كەیكووێد شێره، چروود سایەمه 
نەوتۊلد، گوچانْ گەرْ دەسمه 
ئاخڵەی مانگد پەچیەی پەسمه 
نەورووزگوڵ خێزیا، هەی‌گوڵ هەی‌گوڵده 
چۊ خوداپێ‌دای، دنیا وه دڵده 
هەر چەن پەنجەتی كەپوو كەپووده 
دنیا مەس له بوو ئەترْ شەوبووده 
دنیای والەپەی سەقامێگ نەیرێ 
چۊ گوڵ دو ڕووژه و دەوامێگ نەیرێ 
ئی پرچْ سفیدْ بانْ باڵاده 
جەورْ سەربەرزی ناو دێواڵاده 
هەر دارْ بەرزێ سان خەنەو گژی 
بزان ئەو داره بەر گرتیه بژی 
ئۊشن گەوراماڵْ كەشكەشان، منم 
ئەو كەسه كْ تۊیەمْ شێعر وەشان، منم 
منیش گیانْ تەڕْ كوورسزێگ دێرم 
كەفیدەو لا وام، بوو كزێگ دێرم 
تیەنی نەمەزای بێ‌مزێگ دێرم 
چەرداخْ بۊچگْ پایزێگ دێرم 
ئەر تو نەۊیاتاید وه ستۊنْ مێ 
دژمن فەتیره كرد له خۊنْ مێ 
بەو تنیش چۊ مْ ئایەمی بكه 
فكرێ پەی وەهارْ دایەمی بكه